ველური ბუნებისა და დაცული ტერიტორიების სააგენტოს სპეციალისტებმა, ალგეთის ეროვნულ პარკში, წინასწარ შერჩეულ ლოკაციაზე, პოპულაციის აღდგენის მიზნით, ადგილობრივი სახეობა, 200 ფრთა კაკაბი და 200 ფრთა გნოლი ველურ ბუნებაში გაუშვეს, – ინფორმაციას საქართველოს გარემოს დაცვისა და სოფლის მეურნეობის სამინისტრო ავრცელებს.

უწყების ცნობით, ალგეთის ეროვნულ პარკში გაშვებული ფრინველები, სოფელ ჭორვილას მეფრინველეობის ფერმიდანაა.

„ფრინველების ველურ ბუნებაში გაშვების პროცესში ველური ბუნების სააგენტოს უფროსი რევაზ ბეჟაშვილი და დაცული ტერიტორიების სააგენტოს თავმჯდომარე ბესიკ ამირანაშვილი მონაწილეობდნენ.

აღსანიშნავია, რომ დაცულ ტერიტორიებზე სახეობების აღდგენა და კონსერვაცია ველური ბუნების სააგენტოსა და დაცული ტერიტორიების სააგენტოს საქმიანობის მნიშვნელოვანი პრიორიტეტია. ამ მიმართულებით ორივე სააგენტო არაერთ პროექტს ახორციელებს.

კაკაბი ველური ბუნების სახეობაა და ძირითადად აღმოსავლეთ საქართველოშია გავრცელებული. მისი საცხოვრებელი ადგილებია უტყეო, კლდიანი და ძეძვით დაფარული გორაკები; კაკაბი ფართოდ იყო გავრცელებული თბილისის ირგვლივ განლაგებულ მთებსა და გორაკებზეც, ხოლო გნოლი საქართველოში ბინადრობს, ზამთარში მომთაბარეობს; ცხოვრობს ბუჩქნარით შემოფარგლულ ველ-მინდვრებში, ყანებში და ზეგნებზე, ზღვის დონიდან 2600 მ-მდე.

მნიშვნელოვანია აღინიშნოს, რომ 2016 წლიდან ველური ბუნების ეროვნული სააგენტო ადგილობრივი ველური სახეობის ფაუნის გამრავლების და ბუნებაში აღდგენის პროექტს ახორციელებს. პროექტის ფარგლებში, ყოველწლიურად, კოლხური ხოხბის, კაკბისა და პორფირიონის (ხონთქრის ქათამი) პოპულაცია იზრდება“, – აღნიშნულია გავრცელებულ ინფორმაციაში.