„პროცესი მარტივი არ იყო – უკვე აზომილია 2 მლნ 100 ათას ნაკვეთზე მეტი, რაც დაახლოებით 1 მლნ 100 ათას ჰექტარზე მეტს შეადგენს“-პაატა სალია მიწის სისტემური რეგისტრაციის რეფორმაზე

უკვე აზომილია 2 მლნ 100 ათას ნაკვეთზე მეტი, რაც დაახლოებით 1 მლნ 100 ათას ჰექტარზე მეტს შეადგენს, – განაცხადა გადაცემაში „იმედის კვირა“ იუსტიციის მინისტრმა პაატა სალიამ მიწის რეგისტრაციის რეფორმაზე საუბრისას.

მისივე თქმით, პროცესი მარტივი არ იყო, თუმცა, საჯარო რეესტრმა წარმატებით შეძლო რეფორმის შესრულება.

„ის ნიშნული, რომელიც განსაზღვრული იყო „ხედვა 2023“-ით, რომ 95% მიწის ნაკვეთებისა რეგისტრირებული ყოფილიყო, ეს განხორციელებულია და უკვე აზომილია 2 მლნ 100 ათას ნაკვეთზე მეტი, რაც დაახლოებით 1 მლნ 100 ათას ჰექტარზე მეტს შეადგენს. ეს შეეხო არა მარტო აუზომელ მიწებს, არამედ იმ მიწებს, რომლებიც ადრე იყო აზომილი და არსებობდა გარკვეული შეცდომები, სრულად გამოსწორდა ეს მდგომარეობა, რაც მნიშვნელოვანია საქართველოს ეკონომიკისთვის“, – განაცხადა სალიამ.

იუსტიციის მინისტრის თქმით, მესაკუთრედ უკვე რეგისტრირებულია 1 მლნ 480 ათას მოქალაქეზე მეტი, რაც საქართველოს მოსახლეობის დაახლოებით 30%-ია.

„ეს შესაძლებლობას აძლევს მიწის მესაკუთრეებს, მოიზიდონ ინვესტიციები, დააბანდონ აგრობიზნესში, საქართველოს ეკონომიკისთვის ამას ძალიან მნიშვნელოვანი როლი ექნება“, – განაცხადა პაატა სალიამ.