გასულ წელს საშუალოდ ერთმა მოქალაქემ 204 კგ რძე და რძის პროდუქტები მოიხმარა

საქართველოში გასულ წელს საშუალოდ ერთმა მოქალაქემ 204 კგ რძე და რძის პროდუქტები მოიხმარა.

ამის შესახებ საქსტატის მიერ გამოქვეყნებულ სოფლის მეურნეობის პუბლიკაციაშია აღნიშნული. მოხმარების მაჩვენებელი 2022 წელს 191 კგ იყო წელიწადში, 2021 წელს – 192 კგ, ხოლო 2020 წელს 183 კგ.

რაც შეეხება წარმოებას, გასულ წელს, საქსტატის მონაცემებით, ქვეყანაში 584 ათასი ტონა რძე და რძის ნაწარმი იწარმოა, იმპორტის მოცულობამ 197 ათასი ტონა შეადგინა. წარმოებული და იმპორტირებული რძისა და რძის ნაწარმის უდიდესი ნაწილი – 756 ათასი ტონა – სასურსათო მიზნით იქნა მოხმარებული, მცირედი კი პირუტყვის საკვებად. ამასთან ექსპორტის მოცულობამ 5 000 ტონა შეადგინა, დანაკარგი კი 9000 ტონა იყო.