როგორ გავზარდოთ გოჭი?
რა თქმა უნდა, გლეხების უმეტესობისათვის ეს ჩვეულებრივი საქმეა, მაგრამ ბევრს არავითარი ცოდნა არ აქვს ამ საქმიანობაში. არადა, სანამ გოჭს შეიძენთ, იზრუნეთ ნორმალური საღორის აშენებაზე. ის უნდა იყოს თბილი, მშრალი, კაპიტალური სახურავით გადახურული. იატაკი ჯობს ფიცრის, აუცილებლად კარისკენ დახრილი. საჭიროა ფანჯარაც, რომლის სიდიდეს ასე ანგარიშობენ: იატაკის ფართობს ყოფენ 12-ზე და იმ ზომის ფანჯარას აკეთებენ. საღორეს პატარა ეზოც სჭირდება, სადაც გოჭი სეირნობს და საკვებსაც იქვე იღებს.
ერთ-ერთი მნიშვნელოვანი საკითხია ცხოველის კვება. უნდა ისიც იცოდეთ, რომ მეტწილ საკვებს აძლევენ ნატურალური სახით. მარცვლეული მიეცით დაფქულ-დაღერღილი, ძირხვენები და ბაღჩეული (კიტრი, გოგრა, ნესვი, საზამთრო და ა.შ.) – დაქუცმაცებული. კარტოფილი აუცილებლად კარგად გარეცხეთ (ასევე ძირხვენებიც), თუ ღივები აქვს, შეაცალეთ, დამპალი და გამწვანებული ნაწილები მოაჭერით, მოხარშეთ და ისე მიეცით.
გახსოვდეთ
მიეცით იმდენი საკვები, რომ საკვებურში არ დარჩეს! ასეთი საკვები გადასაყრელი ხდება, რაც არაეკონომიურია. ამიტომ, აჭამეთ 15-20 წუთის განმავლობაში, შემდეგ ააცალეთ საჭმელი და დაუდგით წყალი.
მარცვლეულ-ფურაჟს დაამატეთ სუფრის მარილი, ცარცი, ძვლის ფხვნილი, ხის ნახშირი, დაფქული ნიჟარები. სუფრის მარილი აუცილებელია, ოღონდ მიეცით ასე: 2 თვის გოჭს – 10გ-მდე, 3 თვისას – 15 გ, 4 თვისას – 18-20 გ, 4-5 თვისას 20 გ, 7-12 თვისას – 35გ, ხოლო ზრდასრულებს 40-45 გ დღეში.
წყარო: ნიკოლოზ იოსებიძე, ყველაფერი საოჯახო მეურნეობის შესახებ (გამომცემლობა პალიტრა L)
ზოგიერთი რამ ბოცვერსა და მებოცვრეობაზე
