2024 წლის 26-28 აგვისტოს, ევროკავშირისა და შვედეთის დაფინანსებული ENPARD IV პროგრამის ფარგლებში, გაეროს სურსათისა და სოფლის მეურნეობის ორგანიზაციამ (FAO) ნუშისა და ზეთისხილის მწარმოებლებისთვის სამდღიანი ტრენინგი ჩაატარა თბილისსა და სიღნაღში. ინფორმაციას გაეროს სურსათისა და სოფლის მეურნეობის ორგანიზაცია ავრცელებს.

მათივე ცნობით, სურსათის უვნებლობის პრაქტიკული და თეორიული მასტერკლასები ქვეყანაში არსებული საჭიროებებისა და შესაძლებლობების გათვალისწინებით შეიქმნა. FAO-მ ღონისძიება სოფლის განვითარების სააგენტოსა და ნუშისა და კაკლის მწარმოებელთა ასოციაციასთან თანამშრომლობით განახორციელა. ტრენინგის მიზანია, სურსათის უვნებლობის სტანდარტების დანერგვაში საქართველოს ნუშისა და ზეთის ხილის სექტორების მხარდაჭერა და ამგვარად, ევროკავშირსა და მის ფარგლებს მიღმა საექსპორტო შესაძლებლობების ზრდის ხელშეწყობა.

საგანმანათლებლო სესიებს, საჯარო და კერძო სექტორის 70-ზე მეტი წარმომადგენელი დაესწრო. ტრენინგს FAO-ს ნუშისა და ზეთისხილის საერთაშორისო ექსპერტი, ხუან ოლივარესი უძღვებოდა. მან ნუშისა და ზეთისხილის წარმოებასა და გადამუშავებაზე ჩაატარა პრეზენტაციები, გაუძღვა დისკუსიებს და გააზიარა გამოცდილება და პრაქტიკული უნარები. ტრენინგი ევროკავშირის „ფერმიდან-ჩანგლამდე“ სტრატეგიასთან თანხვედრაშია და სოფლის მეურნეობის კომპლექსური სტანდარტებისა და ევროკავშირის სურსათის უვნებლობისა და ბიოუსაფრთხოების რეგულაციების შესაბამისი დაგეგმილი საკანონმდებლო ინიციატივის გზამკვლევს წარმოადგენს.

საგანმანათლებლო შეხვედრებზე FAO-ს საერთაშორისო ექსპერტმა, ნუშისა და ზეთისხილის ბაღების მართვასა და HACCP სისტემაზე ისაუბრა. ზეთისხილის მწარმოებლებისთვის კი პირველად წარმოებასა და მოსავლის აღების შემდგომ გადამუშავებაში ევროკავშირის სტანდარტებისა და გამოცდილების დანერგვით, ზეთისხილის ზეთის ხარისხის გაუმჯობესებაზეც გამახვილდა ყურადღება.

ტრენინგის მიღმა, FAO-ს საერთაშორისო ექსპერტმა რამდენიმე ბაღი და გადამამუშავებელი საწარმოც მოინახულა, ადგილობრივ დაინტერესებულ მხარეებს საკუთარი გამოცდილება გაუზიარა და საქართველოში ნუშისა და ზეთისხილის წარმოებისა და გადამუშავების ამჟამინდელი მდგომარეობა შეაფასა.

„ევროკავშირი ნუშისა და ზეთისხილის მწარმოებლების შესაძლებლობების გაზრდას, ქართველი მომხმარებლისთვის უფრო მეტად მაღალი ხარისხის პროდუქტის მიწოდებასა და ევროპის ბაზრებზე წვდომის გაუმჯობესებას უჭერს მხარს. სურსათის უვნებლობის სტანდარტების ინსტიტუციონალიზაცია პროდუქტის ექსპორტის მეშვეობით სასოფლო-სამეურნეო კომპანიების შემოსავალს ზრდის, რაც თავის მხრივ მაღალანაზღაურებად სამუშაო ადგილებს აჩენს ადგილობრივი სპეციალისტებისთვის”, – განაცხადა დენის რაისმა, საქართველოში ევროკავშირის წარმომადგენლობის მდგრადი სასურსათო სისტემების პროგრამის მენეჯერმა.

„სურსათის უვნებლობისა და ფიტოსანიტარიული სტანდარტების გაუმჯობესება სარგებლის მომტანია ქართველი მომხმარებლებისთვის და ასევე იმპორტიორი ქვეყნების მოთხოვნების დასაკმაყოფილებლადაც, რაც ქართული ნუშისა და ზეთისხილის სექტორების პოტენციალის რეალიზებას უზრუნველყოფს და მათ სოფლის მეურნეობის ინდუსტრიის ეკონომიკურ მამოძრავებელ ძალებად ჩამოაყალიბებს. ევროკავშირის მხარდაჭერით, აღნიშნული პროცესის დასაჩქარებლად, FAO-მ 670 სასოფლო-სამეურნეო პროდუქტის მწარმოებელს, საჯარო სექტორის წარმომადგენელსა და სტუდენტს უკვე ჩაუტარა შესაბამისი ტრენინგი. ასეთი საგანმანათლებლო სესიები ქვეყანაში სოფლის მეურნეობის ინდუსტრიისთვის ფუნდამენტურ რესურსებს წარმოადგენს და FAO აქტიურად განაგრძობს ამ ტიპის აქტივობების მხარდაჭერას“,- ამბობს FAO-ს პროგრამის მენეჯერი, გუიდო აგოსტინუჩი.

გარემოს დაცვისა და სოფლის მეურნეობის სამინისტროს ინიცირებით, სოფლის განვითარების სააგენტომ სასათბურე მეურნეობის შექმნით დაინტერესებული პირებისთვის ახალი პროგრამა დაიწყო.

„პროგრამის მიზანია ქვეყნის მასშტაბით ერთწლოვანი სასოფლო-სამეურნეო კულტურების წარმოების ხელშეწყობა თანამედროვე კლიმატგონივრული ტექნოლოგიების დანერგვის გზით.

პროგრამის ამოცანას წარმოადგენს ახალი სასათბურე მეურნეობების მოსაწყობად საჭირო ფინანსებზე ხელმისაწვდომობით, სათბურში წარმოებული პროდუქციის მოცულობის გაზრდა, მათ შორის, არასეზონურ პერიოდში.

აღნიშნული მიზნობრიობით პოტენციურმა ბენეფიციარმა შესაძლებელია მიიღოს კომბინირებული სახის დაფინანსება, როგორც საგრანტო, ასევე პროგრამის ფარგლებში კომერციული ბანკის მიერ გაცემული კრედიტის არაუმეტეს 24 თვის საპროცენტო განაკვეთის სრული დაფინანსების სახით. კრედიტის მოცულობა უნდა შეადგენდეს არანაკლებ 50 000 ლარს და არაუმეტეს 1,000,000 ლარს, ხოლო საგრანტო დაფინანსება განისაზღვრება სესხის თანხის არაუმეტეს 30%-ით და გაიცემა ბენეფიციარის მიერ ნაკისრი ვალდებულებების სრულად შესრულების შემდეგ. ამასთან ჯამური დაფინანსება განისაზღვრება გაცემული სესხის თანხის არაუმეტეს 50%-ით.

პროგრამა ხელს შეუწყობს სახელმწიფოს მხრიდან განსაზღვრული თანადაფინანსების გზით ახალი სამუშაო ადგილების შექმნასა და სასათბურე მეურნეობების შექმნის წახალისებას. პროგრამის ფარგლებში განსაზღვრული მხარდამჭერი მექანიზმების სარგებლობის შემთხვევაში, ადგილობრივი ბენეფიციარები შეძლებენ შექმნან სასათბურე მეურნეობები და შედეგად ხელი შეეწყობა ბაღჩეული და ბოსტნეული კულტურების იმპორტის ჩანაცვლებას და საექსპორტო პოტენციალის გაზრდას, მათ შორის არასეზონურ პერიოდში“, – აღნიშნულია სამინისტროს მიერ გავრცელებულ ინფორმაციაში.

ახალი სახელმწიფო პროგრამის ბიუჯეტი 25 მილიონ ლარს შეადგენს.