გარემოს დაცვისა და სოფლის მეურნეობის მინისტრმა დავით სონღულაშვილმა, იმერეთის რეგიონში ვიზიტის ფარგლებში, ქალაქ ქუთაისში, მინერალური რესურსების ეროვნული სააგენტოს ახალი რეგიონული ოფისი გახსნა.

მინისტრმა თანამედროვე სტანდარტების შესაბამისად მოწყობილი და აღჭურვილი შენობა დაათვალიერა. დავით სონღულაშვილი სააგენტოს თანამშრომლებსაც შეხვდა. მინისტრმა ხაზგასმით აღნიშნა, რომ თანამედროვე სტანდარტების შესაბამისი კომფორტული გარემო კიდევ უფრო ეფექტიანს გახდის საქმიანობას და გაზრდის მომსახურების ხარისხს.

„დასავლეთ საქართველოში მინერალური რესურსების ეროვნული სააგენტოს ახალი რეგიონული ოფისის გახსნა წარმოადგენს მნიშვნელოვან ნაბიჯს სააგენტოს სერვისების ხელმისაწვდომობის გაზრდისა და რეგიონებში წიაღის სექტორის ეფექტიანი მართვის მიმართულებით. მნიშვნელოვანია, რომ მოქალაქეებსა და ბიზნესს ჰქონდეს შესაძლებლობა, საჭირო სერვისები ადგილზე, სწრაფად და ეფექტიანად მიიღოს. ჩვენი მიზანია, თანამედროვე მიდგომებისა და საუკეთესო პრაქტიკის დანერგვით შევქმნათ უფრო გამჭვირვალე, შედეგზე ორიენტირებული სერვისები, რომელიც თავსებადი იქნება გარემოსდაცვით სტანდარტებთან“,- განაცხადა დავით სონღულაშვილმა.

ახალი რეგიონული ოფისის გახსნას, გარემოს დაცვისა და სოფლის მეურნეობის მინისტრთან ერთად, მინისტრის მოადგილეები ლაშა ავალიანი და გიორგი წკრიალაშვილი, ქუთაისის მერი დავით ერემეიშვილი, მინერალური რესურსების ეროვნული სააგენტოს უფროსი აბელ აბესაძე, სოფლის განვითარების სააგენტოს დირექტორი ზურაბ გოზალიშვილი, სურსათის ეროვნული სააგენტოს უფროსი გიორგი იაკობაშვილი და ადგილობრივი ხელისუფლების წარმომადგენლები იმყოფებოდნენ.

გარემოს დაცვისა და სოფლის მეურნეობის მინისტრი დავით სონღულაშვილი მსოფლიო ღვინის ინდუსტრიაში ცნობილი საკონსულტაციო კომპანიის Dragon Phoenix Wine Consulting წამყვან ღვინის მაგისტრებს ფოგი ვოლკერს (Fogyee Walker) და ედუარდ რაგს (Edward Ragg) შეხვდა, – ინფორმაციას გარემოს დაცვისა და სოფლის მეურნეობის სამინისტრო ავრცელებს.

„მადლობა მინდა გადაგიხადოთ, ჩინეთში ქართული ღვინის პოპულარიზაციაში შეტანილი წვლილისთვის. ჩვენთვის მნიშვნელოვანია, ჩინეთში ქართული ღვინის ცნობადობის ამაღლება. ვფიქრობ, კოორდინირებული თანამშრომლობით შევძლებთ სასურველი შედეგის მიღწევას“, – განაცხადა დავით სონღულაშვილმა.

„ღვინის მაგისტრის საქმიანობაში მნიშვნელოვანია ემოცია, გულიდან წამოსული სიტყვები. მოუთმენლად ველი ღვინის რეგიონში, კახეთში სტუმრობას, რაც დარწმუნებული ვარ, დამეხმარება ქართულ ღვინოზე გულწრფელ საუბარში“, – განაცხადა ფოგი ვოლკერმა.

აღსანიშნავია, რომ ღვინის მაგისტრები ჩინეთის ბაზრისთვის მუშაობენ და ბაზრის ექსპერტული ანალიზის მრავალწლიანი გამოცდილება გააჩნიათ.

გარემოს დაცვისა და სოფლის მეურნეობის სამინისტროში გამართულ შეხვედრას ღვინის ეროვნული სააგენტოს თავმჯდომარე ლევან მეხუზლა ესწრებოდა.

ჩინეთი ქართული ღვინის ერთ-ერთი გამოკვეთილი სტრატეგიული ბაზარია, სადაც ქართული ღვინის ცნობადობისა და ექსპორტის გაზრდის მიზნით, 2013 წლიდან აქტიურად მიმდინარეობს მარკეტინგული კამპანია. ჩინეთი მყარად დამკვიდრდა ქართული ღვინის ექსპორტიორი ქვეყნების ხუთეულში. მიმდინარე წლის იანვარ-მაისის მონაცემებით, საქართველოდან ჩინეთში ექსპორტირებულია 1.4 მლნ ლიტრი ქართული ღვინო, რაც 65%-ით აღემატება გასული წლის ანალოგიური პერიოდის მაჩვენებელს.

ამჟამად ჩინეთში 40-მდე ქართული ღვინის სახლი, მაღაზია და სალონი მოქმედებს, ხოლო ღვინის ექსპორტს 100-მდე ქართული ღვინის კომპანია ახორციელებს.

ღვინის ეროვნული სააგენტოს მხარდაჭერით, მიმდინარე წელს ქართული ღვინო ჩინეთის სახალხო რესპუბლიკაში წარმოდგენილი იყო გამოფენებზე: ,,Fine Wine Hotel Exhibition”, „The China Food & Drinks Fair“, ,,RAW Wine Shanghai” და „Interwine China 2025“.

ბელგიის სამეფოს დედაქალაქ ბრიუსელში, ბუნებრივი ღვინოების და ალკოჰოლიანი სასმელების მესამე გამოფენაზე „Atomic PIF” ქართული ღვინის წარდგენა ღვინის ეროვნული სააგენტოს მხარდაჭერით და სააგენტოს კონტრაქტორი კომპანიის „FLOW SRL“ ორგანიზებით გაიმართა. ინფორმაციას ღვინის ეროვნული სააგენტო ავრცელებს.

გამოფენაზე წარმოდგენილი იყო ღვინისა და ალკოჰოლიანი სასმელების 30 მწარმოებლის პროდუქცია საქართველოდან, ბელგიიდან, საფრანგეთიდან და გერმანიიდან. გამოფენა-გაყიდვას ღვინის პროფესიონალები, ჰორეკა სექტორის წარმომადგენლები და იმპორტიორები დაესწრნენ, რაც ქართული ღვინის ევროპის ბაზარზე ცნობადობის ზრდის და ახალი სავაჭრო პარტნიორების მოძიების დამატებით შესაძლებლობაა.

ღვინის ეროვნული სააგენტოს საქმიანობის ერთ-ერთ ძირითად მიმართულებას საერთაშორისო ბაზრებზე ქართული ღვინის პოპულარიზაცია წარმოადგენს. სააგენტო ქართული ღვინის პოპულარიზაციის ხელშეწყობის ფარგლებში, 2013 წლიდან, ბაზრების დივერსიფიცირების მიზნით, მიზანმიმართულ სარეკლამო-მარკეტინგულ კამპანიებს აშშ-ში, ევროპისა და აზიის ქვეყნებში ახორციელებს.

გარემოს დაცვისა და სოფლის მეურნეობის მინისტრი დავით სონღულაშვილი ბრიტანელ ღვინის მაგისტრს, სარა ებოტს შეხვდა. მხარეებმა დიდი ბრიტანეთის ბაზარზე ქართული ღვინის ცნობადობისა და ექსპორტის ზრდის ხელშეწყობის საკითხებზე იმსჯელეს.

ხაზგასმით აღინიშნა, რომ დიდი ბრიტანეთის ბაზარზე ქართულ ღვინოს უნდა ჰქონდეს ძლიერი პოზიცია, როგორც ხარისხიან და ავთენტურ პროდუქტს.

„დიდი ბრიტანეთი ჩვენთვის სტრატეგიული ბაზარია, ამიტომ ვცდილობთ, ხელი შევუწყოთ ქართველ მეღვინეებს ბაზარზე წვდომის გაზრდაში. ჩვენი გრძელვადიანი მიზანია მაღალი ხარისხის, პრემიუმ კლასის ღვინის წარმოება და მისი დამკვიდრება საერთაშორისო ბაზრებზე. საქართველოს არ აქვს ბუნებრივი რესურსი, მასშტაბურად აწარმოოს დაბალი ფასის კატეგორიის ღვინო; სწორედ ამიტომ, აქცენტი ხარისხზეა“, – აღნიშნა დავით სონღულაშვილმა.

შეხვედრაზე განსაკუთრებული ყურადღება დაეთმო ქართველი მეღვინეების და ღვინის კომპანიების მიერ ბრიტანეთის ბაზარზე პოზიციონირების გაძლიერებასა და ექსპორტის მოცულობის ზრდას. სარა ებოტმა აღნიშნა, რომ 2024 წელი წარმატებული იყო ქართული ღვინისთვის ბრიტანულ ბაზარზე და წლის განმავლობაში დადებითი გამოხმაურება და გაყიდვების ზრდა დაფიქსირდა. მისი თქმით, 2025 წლისთვის ერთ-ერთი პრიორიტეტია ონლაინ მარკეტებში ქართული ღვინის კომპანიების ცნობადობის გაზრდა.

„ჩვენი მიმდინარე წლის მიზანია, ქართული ღვინის პოზიციონირება მოვახდინოთ ონლაინ გაყიდვების პლატფორმებზე, რომლებიც დიდ ბრიტანეთში განსაკუთრებით პოპულარულია. გასათვალისწინებელია, რომ ღვინის ხარისხი იწყება ვენახიდან, შესაბამისად, როდესაც ვსაუბრობთ ექსპორტის ზრდასა და პრემიუმ სეგმენტში დამკვიდრებაზე, აუცილებელია ყურადღება მივაქციოთ ვენახის მოვლასა და პირველადი ხარისხის უზრუნველყოფასაც“, – განაცხადა სარა ებოტმა.

დიდი ბრიტანეთი მსოფლიოს ერთ-ერთი უმსხვილესი იმპორტიორი და ღვინის მომხმარებელი ქვეყანაა, რომელიც 2014 წლიდან განიხილება როგორც ქართული ღვინის ერთ-ერთი სტრატეგიული საექსპორტო ბაზარი. ქართული ღვინის დიდი ბრიტანეთის ბაზარზე დამკვიდრების მიზნით, ღვინის ეროვნული სააგენტო სარა ებოტის კომპანიასთან „Swirl Wine Group LTD” 2015 წლიდან თანამშრომლობს. სააგენტოს და ქართული ღვინის მწარმოებლებს შორის თანმიმდევრული და მჭიდრო თანამშრომლობის შედეგად, 2024 წელს ექსპორტირებული იყო დაახლოებით 426 ათასი ლიტრი ღვინო, რაც წინა წლის მაჩვენებელს 72%-ით აღემატება.

2025 წელს, ღვინის ეროვნული სააგენტოს ფინანსური მხარდაჭერით, ქართულ ღვინოს დიდ ბრიტანეთში კვლავ „Swirl Wine Group” წარადგენს. მარკეტინგული კამპანიის ფარგლებში დაგეგმილია დეგუსტაცია-სემინარები ქვეყნის სხვადასხვა ქალაქში, ქართული ღვინის მონაწილეობა საერთაშორისო გამოფენებში, ასევე მიზნობრივი სარეკლამო და მედია აქტივობები, რაც დამატებით შეუწყობს ხელს ბრიტანულ ბაზარზე ქართული ღვინის პოპულარიზაციასა და გაყიდვების ზრდას.