გარემოს დაცვისა და სოფლის მეურნეობის სამინისტრომ ახალი პროგრამა – „აგროთანადაფინანსების სახელმწიფო პროგრამა“ წარადგინა, რომელიც აგროსექტორის მხარდაჭერის განახლებულ და თანამედროვე მიდგომას ეფუძნება.

პროგრამის პრეზენტაცია მისასალმებელი სიტყვით საქართველოს პრემიერ-მინისტრმა ირაკლი კობახიძემ და გარემოს დაცვისა და სოფლის მეურნეობის მინისტრმა, დავით სონღულაშვილმა გახსნეს.

დავით სონღულაშვილმა ბოლო ათწლეულში სახელმწიფოს თანმიმდევრული პოლიტიკის შედეგებზე გაამახვილა ყურადღება და აღნიშნა, რომ ამ პერიოდში მნიშვნელოვნად გაფართოვდა აგროსექტორის მხარდაჭერის ინსტიტუციური, ინფრასტრუქტურული, ფინანსური და ტექნიკური მექანიზმები, რაც უკვე ნათლად აისახა როგორც წარმოების, ისე ექსპორტის ზრდაზე.

„დღევანდელი დღე კიდევ ერთხელ აჩვენებს, რომ პოლიტიკური ნების და გრძელვადიანი ხედვის პირობებში შესაძლებელია სოფლის მეურნეობის განვითარების სრულიად ახალი, ტრანსფორმაციული პროგრამის მომზადება. იწყება საქართველოს სოფლის მეურნეობის განვითარების ახალი, მოდერნიზებული ეტაპი.

ჩვენი მიზანია, საქართველოს აგროსექტორის სრული პოტენციალის ათვისება, მისი კონკურენტუნარიანობის გაძლიერება და გლობალურ ბაზრებზე პოზიციების განმტკიცება. აგროთანადაფინანსების პროგრამა მომზადდა ფერმერებთან ფართო დიალოგისა და საუკეთესო საერთაშორისო პრაქტიკის გათვალისწინებით, ქვეყნის რეალურ საჭიროებებზე დაყრდნობით. შედეგად, ჩამოვაყალიბეთ სექტორის მხარდაჭერის ახალი ხედვა, რომელიც ეფუძნება ეფექტიანობასა და შედეგზე ორიენტირებულობას.

პროგრამის მთავარი მიზანია აგროსექტორის განვითარების დაჩქარება, ცოდნის გაღრმავება, ექსპორტის ზრდის ხელშეწყობა და სასურსათო უსაფრთხოების გაძლიერება. ამ რეფორმამ უნდა უზრუნველყოს ფერმერების გაძლიერება, მაღალხარისხიანი ქართული პროდუქციის წარმოება, იმპორტის ჩანაცვლება და საექსპორტო პოტენციალის ზრდა“, – აღნიშნა დავით სონღულაშვილმა.

„აგროთანადაფინანსების სახელმწიფო პროგრამა“ მიზნად ისახავს ერთიანი, ინტეგრირებული, გამჭვირვალე და შედეგებზე ორიენტირებული სისტემის ჩამოყალიბებას. ბენეფიციართა შერჩევა განხორციელდება წინასწარ განსაზღვრული და გამჭვირვალე კრიტერიუმების საფუძველზე, რაც უზრუნველყოფს პროცესის სამართლიანობასა და ეფექტიანობას. გარდა ამისა, პროგრამა ითვალისწინებს პრიორიტეტული სექტორების მიზნობრივ შერჩევას, რაც ხელს შეუწყობს რესურსების ოპტიმალურ გადანაწილებას და მაქსიმალურ შედეგს.

პროგრამის ფარგლებში დაინერგება თანამედროვე ინსტრუმენტები და მექანიზმები, განვითარდება მონაცემთა ბაზები და გაძლიერდება მონიტორინგის სისტემა. ეს უზრუნველყოფს პროცესების უწყვეტ ანალიზს, შედეგების შეფასებას და საბიუჯეტო სახსრების ეფექტიან გამოყენებას.

განსაკუთრებული ყურადღება დაეთმობა აგროსაქმიანობის კომერციალიზაციის გაძლიერებას, რაც, თავის მხრივ, ხელს შეუწყობს სექტორის მდგრად განვითარებას და ქვეყნის სასურსათო უსაფრთხოების გაძლიერებას.

ქართული ვაზისა და ღვინის კულტურის კვლევის სამეცნიერო პროექტის ფარგლებში, საქართველოს სხვადასხვა რეგიონში ველური ვაზის შესწავლის მიზნით საველე ექსპედიციები აქტიურად მიმდინარეობს. კვლევები განხორციელდა მესხეთის, რაჭის, ლეჩხუმის, იმერეთის, ქართლისა და კახეთის მევენახეობის ზონებში, – აღნიშნულია ღვინის ეროვნული სააგენტოს მიერ გავრცელებულ ინფორმაციაში.

მათივე განცხადებით, ველური ვაზი, იგივე ტყის ვაზი და კრიკინა ვაზი, წარმოადგენს კულტურული ვაზის წინაპარს და განსაკუთრებულ მნიშვნელობას იძენს ქართული მევენახეობის ისტორიისა და გენეტიკური მრავალფეროვნების შესწავლის პროცესში.

„ველური ვაზიდან მოდის ქართული ვაზის ჯიშები, რომლებითაც ჩვენ სამართლიანად ვამაყობთ. დიდი მნიშვნელობა აქვს ამ მცენარის ეკოლოგიის შესწავლას, მისი გავრცელების არეალების და გარემოს დადგენას. ველურ ვაზს დაავადებების მიმართ გამძლეობა არ ახასიათებს, მისი რაოდენობა ყოველწლიურად მცირდება და მისი დაცვის გათვალისწინებით, აღრიცხვას დიდი მნიშვნელობა აქვს. აღებული მასალა შემდგომში გამრავლდება კოლექციაში მათი დაცვის მიზნით“, – აღნიშნა პროქტის ხელმძღვანელმა, ღვინის ეროვნული სააგენტოს მევენახეობის კადასტრის სამმართველოს მთავარმა სპეციალისტმა, დავით მაღრაძემ.

პროექტის ფარგლებში მიღწეული შედეგები უკვე აისახა საერთაშორისო სამეცნიერო სივრცეში. მევენახეობა-მეღვინეობის მიმართულების სამეცნიერო ჟურნალში „OenoOne” გამოქვეყნდა მილანის უნივერსიტეტის მკვლევარის, გაბრიელა დე ლორენცის ნაშრომი, რომლის მიხედვითაც დადასტურდა, რომ ქართული ველური ვაზის გენეტიკური სტრუქტურა განსხვავდება ხმელთაშუა ზღვის აუზის ვაზისგან. კვლევა ეფუძნება საქართველოში შეგროვებული ნიმუშების საერთაშორისო შედარებით ანალიზს.

ღვინის ეროვნულმა სააგენტომ აღნიშნული სამეცნიერო პროექტის განხორციელება 2014 წელს დაიწყო. მისი მიზანია საქართველოს, როგორც ღვინის კულტურის უძველესი კერის, მეცნიერული მტკიცებულებებით გამყარება, მევენახეობა-მეღვინეობის უწყვეტი ისტორიის რეკონსტრუქცია და ქართული ღვინის პოპულარიზაცია. პროექტის ფარგლებში ხორციელდება ახალი არქეოლოგიური კვლევების ხელშეწყობა, საქართველოს ტერიტორიაზე აღმოჩენილი სხვადასხვა ისტორიული ეპოქის ვაზის ნაშთების სისტემატიზაცია, დათარიღება, ანალიზი და ბიოქიმიური ტესტირება.

2017 წელს სწორედ აღნიშნული პროექტის სამეცნიერო კვლევების შედეგებზე დაყრდნობით, საერთაშორისო სამეცნიერო საზოგადოებამ აღიარა, რომ მეღვინეობის უძველესი კვალი საქართველოს ტერიტორიაზეა აღმოჩენილი და საქართველო ღვინის სამშობლოა. აღნიშნულმა დასკვნამ ფართო საერთაშორისო გამოხმაურება მოიპოვა და გაშუქდა მსოფლიოს წამყვან მედიასა და სამეცნიერო გამოცემებში. უძველესი ღვინის აღმოჩენის ფაქტი შეტანილია გინესის რეკორდების წიგნში.

დღეს ჩვენ ახალი გამოწვევების წინაშე ვდგავართ. გეოპოლიტიკური არასტაბილურობა, ლოჯისტიკური სირთულეები და სასურსათო უსაფრთხოების საკითხი დღეს მთელი მსოფლიოსთვის უმთავრესი გამოწვევაა. ეს ვითარება ჩვენგან კიდევ უფრო სწრაფ მოქმედებას, ახალი ბაზრების ათვისებას და ადგილობრივი წარმოების მაქსიმალურ გაძლიერებას მოითხოვს, – განაცხადა საქართველოს პრემიერ-მინისტრმა, ირაკლი კობახიძემ აგროთანადაფინანსების პროგრამის პრეზენტაციაზე სიტყვით გამოსვლისას.

როგორც მთავრობის მეთაურმა აღნიშნა, „აგროთანადაფინანსების“ ახალი პროგრამა აერთიანებს აგროწარმოების ყველა საკვანძო მიმართულებას.

„თუ აქამდე ჩვენი მხარდაჭერა მიმართული იყო დარგის გადარჩენასა და კონკრეტული პროექტების გამართვაზე, დღეს ჩვენ განვითარების თვისებრივად ახალ ეტაპზე გადავდივართ და ერთიან სისტემას ვამკვიდრებთ.

„აგროთანადაფინანსების“ ახალი პროგრამით ჩვენ ვაერთიანებთ აგროწარმოების ყველა საკვანძო მიმართულებას. ჩვენი მთავარი მიზანია საშუალო ზომის ფერმერული მეურნეობების გაძლიერება. გვინდა, თქვენ იყოთ წარმატებული, თანამედროვე მეწარმეები, რომელთაც გექნებათ სტაბილური შემოსავალი და ზრდის პერსპექტივა.

სწორედ ამიტომ, მნიშვნელოვნად ვწევთ დაფინანსების ქვედა და ზედა ზღვრებს – ზოგ შემთხვევაში სახელმწიფო თანადაფინანსება ორმაგდება. სახელმწიფო მზად არის, პირველად წარმოებაში აიღოს ხარჯების მინიმუმ 50%, ხოლო გადამუშავებასა და შენახვაში – 40%“, – განაცხადა პრემიერ-მინისტრმა.