თევჭერის წესების დარღვევისთვის ჯარიმა იზრდება

თევზჭერის წესები მკაცრდება. რიგ შემთხვევებში იზრდება ჯარიმები, გარკვეულ შემთხვევებში კი, კანონს ისეთი მუხლები ემატება, რომელიც აქამდე საერთოდ არ არსებობდა.

კანონპროექტის თანახმად, კოდექსს ემატება მუხლი, რომელიც თევზჭერის იარაღის სამოქალაქო ბრუნვას აწესრიგებს. კერძოდ, ამ მუხლის პირველი ნაწილი არეგულირებს სამოქალაქო ბრუნვაში დაშვებული თევზმიმზიდი ელექტროშოკური მოწყობილობის მართლსაწინააღმდეგო შეძენის, შენახვის, ტარების, გადაცემისა და გასხვისების შემთხვევებს. აღნიშნული მოთხოვნების დარღვევისთვის ჯარიმა განსაზღვრულია 1000 ლარის ოდენობით და იარაღის კონფისკაციით. მუხლის მე-2 ნაწილი განსაზღვრავს აღნიშნული ქმედების განმეორებით ჩადენას, რაც გამოიწვევს ჯარიმას 2000 ლარის ოდენობით და იარაღის კონფისკაციით.

პროექტის თანახმად, გემიდან, სხვა მცურავი საშუალებიდან, პლატფორმიდან, მილსადენიდან ან ზღვაში ხელოვნურად აგებული სხვა კონსტრუქციიდან ზღვაში მავნე, დამაბინძურებელი ნივთიერებების, საწარმოო, ტექნიკური ან სხვა სახის ნარჩენების ან/და მასალის ჩაღვრა (ჩაყრა, ჩაშვება), აგრეთვე მათი ჩამარხვის წესის დარღვევით ზღვის დაბინძურება – გამოიწვევს დაჯარიმებას 100 000 ლარის ოდენობით, ნაცვლად 65 000 ლარისა.

იურიდიულ საკითხთა კომიტეტმა „ადმინისტრაციულ სამართალდარღვევათა კოდექსში“ ცვლილება, რომელიც თევზჭერისა და შავი ზღვის დაბინძურების საკითხებს შეეხება, პირველი მოსმენით განიხილა და მხარი დაუჭირა.