ხელვაჩაურის სოფელ ორთაბათუმში, მდინარე ყოროლისწყლის კალაპოტში აშენებული კოტეჯების წყალდიდობისგან დასაცავად 216 მეტრი სიგრძის ნაპირდამცავი ნაგებობის მოწყობაა დაგეგმილი.
დაახლოებით სამი თვის წინ ადიდებულმა მდინარემ ამ კოტეჯებს სერიოზული საფრთხე შეუქმნა.
ნაპირდამცავი ნაგებობის აშენებას აქ შპს „ზულუ ვი აი პი ბლუმუნი“ გეგმავს, რომელმაც გარემოს ეროვნულ სააგენტოს სკრინინგის განცხადებით უკვე მიმართა. სკრინინგის პროცედურით სააგენტომ უნდა გადაწყვიტოს საჭირო იქნება თუ არა გარემოზე ზემოქმედების შეფასების [გზშ-ს] დოკუმენტის მომზადება დაგეგმილ საქმიანობასთან დაკავშირებით.
გარემოსდაცვითი ინფორმაციისა და განათლების ცენტრის ინფორმაციით, საზოგადოების მხრიდან სააგენტოში შენიშვნების წარდგენის ბოლო ვადა 2024 წლის პირველი თებერვალია. თუმცა, კონკრეტულად რა სამუშაოების ჩატარებას გეგმავს კომპანია ცენტრის სპეციალურ პორტალზე შესაბამისი დოკუმენტი ამ დროისთვის არ არის ხელმისაწვდომი.
„დაგეგმილია ხელვაჩაურის მუნიციპალიტეტში, მახინჯაურის რაიონში, სოფ. აგარას და ორთაბათუმის მიმდებარედ, მდინარე ყოროლისწყალის მარჯვენა ნაპირზე, ტურისტული დანიშნულების საცხოვრებელი კოტეჯების უსაფრთხოების უზრუნველყოფის მიზნით, 216 მ-ის სიგრძის ნაპირდამცავი ნაგებობის მოწყობისა და ექსპლუატაციის პროექტის განხორციელება.
ნაპირდამცავი ნაგებობის [საყრდენი კედლის] მოწყობა დაგეგმილია შპს „ზულუ ვი აი პი ბლუმუნ“-ის საკუთრებაში არსებულ არასასოფლო სამეურნეო დანიშნულების მიწის ნაკვეთზე, ჯამური ფართობით 4 240 მეტრი.
… „გარემოსდაცვითი შეფასების კოდექსის“ მიხედვით პროექტი ექვემდებარება ამავე კოდექსისით განსაზღვრული სკრინინგის პროცედურის გავლას.
ზემოაღნიშნულიდან გამომდინარე წარმოგიდგენთ ნაპირდამცავი ნაგებობის მოწყობისა და ექსპლუატაციის პროექტის სკრინინგის ანგარიშს. გთხოვთ, განიხილოთ წარმოდგენილი დოკუმენტაცია და გასცეთ სკრინინგის გადაწყვეტილება“ – ვკითხულობთ შპს „ზულუ ვი აი პი ბლუმუნის“ განცხადებაში, რომელიც გარემოს ეროვნულ სააგენტოშია გაგზავნილი. ეს წერილი 2024 წლის 11 იანვრითაა დათარიღებული.
წერილში აღნიშნული ნაკვეთი, რომელიც კომპანიის საკუთრებაშია, მთლიანად სერვიტუტითაა [სხვისი მიწის ნაკვეთის ან სხვა უძრავი ქონების გამოყენება იმგვარად, რომ პირს უფლება მიეცეს ისარგებლოს ამ ნაკვეთით, ან აკრძალოს ამ ნაკვეთზე მესაკუთრის მიერ ზოგიერთი მოქმედების განხორციელება] დატვირთული მის მიმდებარედ აშენებულ კოტეჯებთან მისასვლელად. ეს კოტეჯები კი სხვადასხვა მოქალაქეებზეა გასხვისებული.
საჯარო რეესტრის ბოლო ამონაწერის თანახმად, შპს „ზულუ ვი აი პი ბლუმუნის“ დირექტორი და მესაკუთრე ისრაელის მოქალაქე ზულუ მაზალ იეროშალმია. კომპანია 2021 წლის ივნისშია დარეგისტრირებული.
მდინარე ყოროლისწყლის კალაპოტთან მდებარე მიწის ნაკვეთი ქონების ეროვნულმა სააგენტომ უპირობო აუქციონის წესით 2021 წელს გაყიდა.
მდინარე ყოროლისწყალი კი, 2023 წლის 3 ოქტომბერს ისე ადიდდა, რომ კოტეჯებს საფრთხე შეუქმნა.
#datashvil #drpkhakadze #sheniambebi #shenisofeli
მასალის გამოყენების პირობები
