ყანის ჭლექი
ერთწლოვანი, 1 მ-მდე სიგრძის ხვიარა მცენარეა მატიტელასებრთა ოჯახიდან. ყუნწიანი ფოთლები კვერცხისებრ-სამკუთხა, გულისებრი ან ისრისებრი ფუძით. ყვავილები ფოთლების იღლიებშია განლაგებული. ნაყოფი სამკუთხა შავი კაკლუჭაა.
ყვავილობს მთელი ზაფხულის განმავლობაში, სიცივის დაწყებამდე. გვხვდება ყველგან და ზიანს აყენებს უამრავ მცენარეს, რაც მისი სახელითაც მტკიცდება. განსაკუთრებით საშიშია მარცვლოვანთა ყანებისთვის. გარდა იმისა, რომ მათ წყლისა და საკვების მარაგს ართმევს, მცენარეს ეხვევა და ყანის ჩაწოლას უწყობს ხელს, რაც მკას ართულებს და დიდ დანაკარგებს იწვევს.
სარეველა მრავლდება მხოლოდ თესლით, რომელიც ადრე გაზაფხულზე ნიადაგის ზედა ფენაში ღივდება.
ბრძოლის ღონისძიებანი: წინასწარი დაფარცხვის შემდეგ საჭიროა საშემოდგომო ღრმა მოხვნა და აღმონაცენების განადგურება კულტივატორის საშუალებით. აუცილებელია სათოხნი კულტურების სისტემატური კულტივაცია. სარეველას გასანადგურებლად გამოიყენება ჰერბიციდები: მარცვლოვნების ნათესებისთვის 2M–4XП, 2,4–D, 2M–4X და დიამეტ-D; სიმინდისთვის – ატრაზინი, სიმაზინი, ეპტამი; სტაფილოსთვის – პრომეტრინი; კომბოსტოსა და ხახვისთვის – რამროდი.
სარეველად ითვლება ყოველი მცენარე, რომელიც დამუშავებულ მიწაზე მამულის პატრონის სურვილის გარეშე ხარობს და, როგორც წესი, დიდ ზიანს აყენებს მეურნეობას და მნიშვნელოვნად ამცირებს მოსავალს
წყარო: ნიკოლოზ იოსებიძე, ყველაფერი საოჯახო მეურნეობის შესახებ (გამომცემლობა პალიტრა L)
