გარემოს დაცვისა და სოფლის მეურნეობის მინისტრმა დავით სონღულაშვილმა კასპის მუნიციპალიტეტის სოფელ ხანდაკში კომპანიების Family Farm (ფემილი ფარმი) და FFF Georgia (ფფფ ჯორჯია) მესაქონლეობის ფერმა, ცხოველთა საკვების საწარმო და მასთან დაკავშირებული ინფრასტრუქტურა დაათვალიერა.

მინისტრი თანამედროვე სტანდარტების ფერმაში ცხოველთა კვების სისტემის მუშაობის პრინციპებს გაეცნო, მოისმინა ინფორმაცია ბიოუსაფრთხოების წესებისა და ვეტერინარული კონტროლის მექანიზმის შესახებ, ასევე, დაათვალიერა მშენებარე ობიექტი, რომლის ექსპლუატაციაში შესვლის შემდეგ, კომპანია წარმოების სიმძლავრეების გაზრდას შეძლებს. ცხოველის საკვების საწარმოში ყურადღება გამახვილდა მარცვლეულის მიღების, ხარისხის კონტროლისა და შენახვის საკითხებზე.

დავით სონღულაშვილმა ქართული წარმოების ხელშეწყობის მნიშვნელობაზე ისაუბრა და აღნიშნა, რომ სახელმწიფო არაერთ პროექტს და პროგრამას ახორციელებს, რომელთა ფარგლებში ფერმერებისა და მეწარმეებისათვის ხელმისაწვდომია შეღავათიანი აგროკრედიტი, სასოფლო-სამეურნეო ტექნიკა, თანამედროვე სტანდარტების დანერგვა, გადამმუშავებელი და შემნახველი ინფრასტრუქტურის შექმნა, ბაღების გაშენება, თანამედროვე სარწყავი სისტემების მოწყობა და კიდევ არაერთი მიზნობრივი მხარდაჭერა.

აღინიშნა, რომ მსხვილფეხა მეცხოველეობის განვითარებისთვის განსაკუთრებული როლი ენიჭება შიდა ქართლის რეგიონს, აქ წარმოდგენილია მაღალპროდუქტიული ფერმების ნაწილი, სადაც იწარმოება მეცხოველეობის პროდუქტების მნიშვნელოვანი წილი, რომლებიც განსაკუთრებით დიდ როლს თამაშობს ქვეყანაში სასურსათო უსაფრთხოების უზრუნველყოფის კუთხით.

კომპანიები Family Farm (ფემილი ფარმი) და FFF Georgia (ფფფ ჯორჯია) სახელმწიფო პროგრამების ბენეფიციარი კომპანიებია. შპს „ფემილი ფარმმა“ „შეღავათინი აგროკრედიტის“ პროექტითა და „მოსავლის ამღები სასოფლო-სამეურნეო ტექნიკის თანადაფინანსების“ პროგრამით ისარგებლა. კომპანიამ „ფფფ ჯორჯია“ შემნახველი საწარმოს შექმნისათვის 500,000 ლარის ოდენობის თანადაფინანსება მიიღო. სახელმწიფო პროგრამის დახმარებით კომპანიამ მარცვლოვნების შემნახველ საწარმოში სურსათის უვნებლობის სტანდარტი HACCP დანერგა.

შპს „ფემილი ფარმში“ დღიურად 16 ტონა ნედლი რძე იწარმოება, რომელიც სრულად რეალიზდება ადგილობრივ ბაზარზე. მომავალი წლიდან, წარმოების სრული ციკლის ამოქმედების შემდეგ, დაგეგმილია რძის ყოველდღიური გამომუშავების 30 ტონამდე გაზრდა.

დავით სონღულაშვილი კასპის მუნიციპალიტეტის სოფელ კავთისხევში, შეღავათიანი აგროკრედიტის პროექტის ბენეფიციარი კომპანიის მეღორეობის ფერმაშიც – „ახალი ფერმა“ იმყოფებოდა; დღეისათვის, ფერმაში წარმადობა 6,000 სულია.

მინისტრთან ერთად, გარემოს დაცვისა და სოფლის მეურნეობის მინისტრის მოადგილე კახა კაკაბაძე, სახელმწიფო რწმუნებული შიდა ქართლის მხარეში სიმონ გულედანი, სურსათის ეროვნული სააგენტოს უფროსი ზურაბ ჩეკურაშვილი, სამინისტროს სისტემაში შემავალი უწყებებისა და ადგილობრივი თვითმმართველობის წარმომადგენლები იმყოფებოდნენ.

მინისტრი კასპის მუნიციპალიტეტის სოფელ ხანდაკში კომპანიების Family Farm (ფემილი ფარმი) და FFF Georgia (ფფფ ჯორჯია) მესაქონლეობის ფერმას, ცხოველთა საკვების საწარმოს და მასთან დაკავშირებულ ინფრასტრუქტურას დაათვალიერებს.

აღნიშნული საწარმოები სახელმწიფო პროგრამების მხარდაჭერით შეიქმნა, – ინფორმაციას გარემოს დაცვისა და სოფლის მეურნეობის სამინისტრო ავრცელებს.

„მინისტრი გორის მუნიციპალიტეტში შეღავათიანი აგროკრედიტის პროგრამის ფარგლებში შექმნილ საკალმახე და სასათბურე მეურნეობებში ფერმერებს შეხვდება და არსებულ საჭიროებებზე ინფორმაციას მოისმენს.

დაგეგმილია შეხვედრები გარემოსდაცვითი ზედამხედველობის დეპარტამენტის და სურსათის ეროვნული სააგენტოს შიდა ქართლის რეგიონული სამსახურების თანამშრომლებთან. დავით სონღულაშვილი შიდა ქართლის სატყეო სამსახურის რეაბილიტირებულ ოფისსაც დაათვალიერებს“, – აღნიშნულია გავრცელებულ ინფორმაციაში.

რიკოთის მაგისტრალური გზის მშენებლობის პროექტის ფარგლებში, შორაპანი-არგვეთას მონაკვეთზე ზესტაფონის შემოვლითი 9 კმ-იანი მაგისტრალური გზა ავტოტრანსპორტისთვის დღეიდან გაიხსნება.

აღმოსავლეთ-დასავლეთის საერთაშორისო მაგისტრალზე (E60) მოძრავ ავტოტრანსპორტს აღარ მოუწევს ქალაქ ზესტაფონში შესვლა და ისარგებლებს ზესტაფონის შემოვლითი ახალი გზით, რომელიც არგვეთას კვანძთან შეუერთდება აღმოსავლეთ-დასავლეთის ჩქაროსნულ მაგისტრალს. ახალი გზა ზესტაფონს განტვირთავს სატრანზიტო მოძრაობისგან და შეამცირებს მაგისტრალით მგზავრობის დროს. შემოვლითი გზის გავლას მხოლოდ 6 წუთი დასჭირდება.

ზესტაფონის შემოვლითი 9 კმ-იანი, 4 ზოლიანი ცემენტ-ბეტონის გზა მოიცავს 4 გვირაბს და 11 ხიდს. ახალი გზა რიკოთის პროექტის შორაპანი-არგვეთას მონაკვეთის ნაწილია, სადაც გათვალისწინებულია 14.7 კმ-იანი ჩქაროსნული გზის მშენებლობა. ამ ეტაპზე, სამუშაოების 80% დასრულებულია – 17 ხიდიდან აშენებულია 15 ხიდი და გაჭრილია ათივე გვირაბი.

ზესტაფონის შემოვლითი გზა, როგორც მაგისტრალური გზის ყველა მონაკვეთი, მნიშვნელოვნად გაზრდის საგზაო უსაფრთხოების სტანდარტს და უზრუნველყოფს კომფორტულ და შეუფერხებელ გადაადგილებას.

ამასთან, უკვე მიმდინარეობს შესაბამისი პროცედურები ახალ მაგისტრალურ გზასთან მგზავრთა მომსახურების ცენტრის მოსაწყობად, სადაც გათვალისწინებული იქნება სივრცეები ზესტაფონის ტრადიციული სწრაფი კვების ობიექტებისთვის. რიკოთის საუღელტეხილო გზის მშენებლობის ფარგლებში, შენდება 52 კმ-მდე გზა, რომელიც მოიცავს 97 ხიდსა და 51 გვირაბს. ამ დროისათვის, ავტოტრანსპორტისთვის უკვე გახსნილია 36 კმ გზა, აშენებულია 89 ხიდი და გაჭრილია 50 გვირაბი. სამშენებლო სამუშაოები პარალელურად მიმდინარეობს ყველა დარჩენილ ხიდსა და გვირაბზე. საერთო ჯამში, რიკოთის მაგისტრალური ახალი გზის 70%-ით ავტოტრანსპორტი უკვე სარგებლობს.

შორაპანი-არგვეთას მონაკვეთზე მაგისტრალური გზის მშენებლობა აზიის განვითარების ბანკის (ADB) მხარდაჭერით მიმდინარეობს. რიკოთის საუღელტეხილო მონაკვეთის სამშენებლო სამუშაოების ჯამური ღირებულება 2.6 მილიარდი ლარია. პროექტი 2024 წლის ბოლოს დასრულდება.
დღევანდელი მდგომარეობით, აღმოსავლეთ-დასავლეთის მაგისტრალური გზის 276 კმ ანუ 64% ავტოტრანსპორტისთვის უკვე გახსნილია. სამშენებლო სამუშაოები გრძელდება მაგისტრალის 66,1 კმ-ზე.

სოფლის მეურნეობის სექტორში კონკურენტუნარიანობის გაზრდის ხელშეწყობის, სურსათის წარმოების გაძლიერების, ახალი ტექნოლოგიების დანერგვის, ფერმერების ცოდნის ამაღლების, ამავდროულად, სოფლად სიღარიბის შემსუბუქების, დარგში გენდერული და სოციალური ბალანსის მხარდაჭერის მიზნით, საქართველოს გარემოს დაცვისა და სოფლის მეურნეობის მინისტრმა ოთარ შამუგიამ და გაეროს სურსათისა და სოფლის მეურნეობის ორგანიზაციის (FAO) წარმომადგენელმა საქართველოში რაიმუნდ იელემ ახალი პროექტის „ინკლუზიური სოფლის განვითარება და მდგრადი სოფლის მეურნეობა” შეთანხმების დოკუმენტს მოაწერეს ხელი.

„გულწრფელი მადლობა მინდა გადავუხადო FAO-ს და ავსტრიის მთავრობას, კერძოდ, ავსტრიის განვითარების თანამშრომლობას (ADC) წლების განმავლობაში გაწეული მხარდაჭერისა და პარტნიორული თანამშრომლობისთვის. ჩვენ, ერთობლივი ძალისხმევით, არაერთი მნიშვნელოვანი პროექტი განვახორციელეთ. მოგეხსენებათ, საქართველო ევროკავშირთან თანამშრომლობის ახალ ეტაპზეა და ხაზგასმით მინდა აღვნიშნო, რომ ამ პროცესში FAO-სა და პარტნიორი ორგანიზაციების ჩართულობა განსაკუთრებით მნიშვნელოვანია.

როგორც იცით, ევროკავშირის კანდიდატის სტატუსის მიღების შემდეგ, შესასრულებელი გვაქვს რიგი რეკომენდაციები, რომელთა ეფექტიანად და დროულად შესრულება ჩვენ დღის წესრიგს და პრიორიტეტს წარმოადგენს. ვფიქრობ, კოორდინირებული მუშაობით ახალი პროექტი სოფლის მეურნეობის დარგის გაძლიერებასა და რეკომენდაციების ეფექტიან შესრულებაში მნიშვნელოვან წვლილს შეიტანს“, – განაცხადა ოთარ შამუგიამ.

გაეროს სურსათისა და სოფლის მეურნეობის ორგანიზაციის (FAO) წარმომადგენელმა საქართველოში რაიმუნდ იელემ მადლობა გადაუხადა მინისტრს და აღნიშნა, რომ ახალი პროექტის ხელმოწერა ქვეყნის მხარდაჭერის და სამომავლო თანამშრომლობის დასტურს წარმოადგენს.

როგორც რაიმუნდ იელემ აღნიშნა, FAO მხარს უჭერს საქართველოს ევროკავშირთან დაახლოების პროცესს. მისი განცხადებით, ახალი პროექტის ხელმოწერით ქვეყნის სოფლის მეურნეობის დარგში განვითარების ახალი ეტაპი იწყება.

აღსანიშნავია, რომ პროექტის ბიუჯეტი 4 მილიონი აშშ დოლარია და, ადგილობრივი და საერთაშორისო ექსპერტების ტექნიკური მხარდაჭერით, ოთხი წლის განმავლობაში გაგრძელდება.

პროექტის სამიზნე ჯგუფებს ორი საპილოტე მუნიციპალიტეტიდან, რომელიც გარემოს დაცვისა და სოფლის მეურნეობის სამინისტროსთან, FAO-სთან, ADC-სთან და დაინტერესებულ მხარეებთან კონსულტაციების გზით პროექტის საწყის ეტაპზე შეირჩევა – ფერმერები, ფერმერთა ასოციაციები/კოოპერატივები, სოფლად მცხოვრები შინამეურნეობები, საგანმანათლებლო დაწესებულებები, კერძო სექტორის წარმომადგენლები და საოჯახო ფერმების მფლობელები წარმოადგენენ.

პროექტი გაეროს სურსათისა და სოფლის მეურნეობის ორგანიზაციის (FAO) მიერ, საქართველოს გარემოს დაცვისა და სოფლის მეურნეობის სამინისტროსთან ერთად, ავსტრიის განვითარების თანამშრომლობის (ADC) ფინანსური მხარდაჭერით განხორციელდება. პროექტის მჭიდრო პარტნიორია საქართველოს რეგიონული განვითარებისა და ინფრასტრუქტურის სამინისტრო.

ინფორმაციას გარემოს დაცვისა და სოფლის მეურნეობის სამინისტრო ავრცელებს.