გარემოს დაცვისა და სოფლის მეურნეობის მინისტრი დავით სონღულაშვილი, სოფლის განვითარების სააგენტოს დირექტორ გიორგი დარჩიასთან ერთად, გარდაბნის მუნიციპალიტეტის სოფელ თელეთში იმყოფებოდა, სადაც საწარმოში „თელეთის რძის პროდუქტები“ სამუშაო პროცესს გაეცნო.

სამინისტროს ინფორმაციით, კომპანია შპს ,,თელეთის რძის პროდუქტები“ სოფლის განვითარების სააგენტოს ბენეფიციარია. რძის გადამმუშავებელი საწარმოს შექმნა „გადამმუშავებელი და შემნახველი საწარმოების თანადაფინანსების პროგრამით“ 350 000 ლარით არის დაფინანსებული. საწარმო, რომელიც დღიურად 5 ტონა რძეს გადაამუშავებს, სხვადასხვა სახეობის ყველს ამზადებს. პროდუქციის რეალიზაცია ძირითადად ქსელურ რესტორნებში, სასტუმროებში და თბილისში მდებარე საწარმოს მაღაზიაში ხდება. საწარმოში 35 ადამიანია დასაქმებული.

დავით სონღულაშვილი სოფლის განვითარების სააგენტოს პროგრამებით მოსარგებლე ფერმერებს და მეწარმეებსაც შეხვდა.

„ბოლო წლებში აგროწარმოების ზრდა სახელმწიფოს მხრიდან განხორციელებული მიზნობრივი პროექტების შედეგია. ჩვენი ფერმერებისა და მეწარმეებისათვის უკვე ათეულ წელზე მეტია ხელმისაწვდომია შეღავათიანი ფინანსური რესურსი, სასოფლო-სამეურნეო ტექნიკა, ტექნოლოგიები, საერთაშორისო ბაზრები. სახელმწიფოს მხრიდან მხარდაჭერა გრძელდება, რისთვისაც მნიშვნელოვანია პირდაპირი კომუნიკაცია წარმოებაში ჩართულ ადამიანებთან და მათი საჭიროებების შესახებ ინფორმაციის მოსმენა“, – განაცხადა დავით სონღულაშვილმა.

სოფლის განვითარების სააგენტოს მიერ „გადამმუშავებელი და შემნახველი საწარმოების თანადაფინანსების პროგრამის“ ფარგლებში, საქართველოს მასშტაბით 130 მლნ ლარზე მეტით თანადაფინანსებულია 281 საწარმოს შექმნა, მათ შორის ქვემო ქართლის რეგიონში 9,6 მლნ ლარით თანადაფინანსებულია 21 გადამმუშავებელი და შემნახველი საწარმო.

გარემოს დაცვისა და სოფლის მეურნეობის მინისტრთან ერთად, მინისტრის მოადგილე კახა კაკაბაძე, სახელმწიფო რწმუნებული ქვემო ქართლის მხარეში ლევან ხარაბაძე და გარდაბნის მუნიციპალიტეტის მერი დავით კარგარეთელი იმყოფებოდნენ.

საქართველოს თხილის სექტორს სურსათის უვნებლობასთან დაკავშირებული კიდევ ერთი საგანმანათლებლო შესაძლებლობა მიეცა. ამჯერად ტრენინგის მთავარ თემას მოსავლის აღებისა და აღების შემდგომი ოპერაციები წარმოადგენდა.

ცოდნის გაზიარებაზე ორიენტირებული შეხვედრები განხორციელდა გაეროს სურსათისა და სოფლის მეურნეობის ორგანიზაციის (FAO) მიერ აგრიჯორჯიასთან (ფერეროს თხილის კომპანია) პარტნიორობით და ევროკავშირისა და შვედეთის ფინანსური მხარდაჭერით ENPARD IV პროგრამის ფარგლებში.

ტრენინგის მიზანს საქართველოს თხილის სექტორის საერთაშორისო ბაზრებზე კონკურენტუნარიანობის გაზრდის მიმართულებით მხარდაჭერა წარმოადგენდა, თხილის პირველადი წარმოებისა და გადამუშავების პროცესებში საკვების უსაფრთხოების მოწინავე ზომების დანერგვის გზით. საგანმანათლებლო სესიები ჩატარდა კახეთსა და სამეგრელო-ზემო სვანეთში, სადაც თხილის წარმოება აქტიურად ხორციელდება.

საგანმანათლებლო შეხვედრების მონაწილეები თხილის ხარისხისა და უვნებლობის უზრუნველსაყოფად საჭირო საკითხებს გაეცნენ. ტრენინგები მოიცავდა შემდეგ თემებს:

– თხილის ამღები ტექნიკის გამოყენება მოსავლის მექანიკური აღების დროს;

– მექანიკური მეთოდების უპირატესობები და შეზღუდვები მოსავლის ხელით აღებასთან მიმართებაში;

– მოსავლის აღების შემდეგ სათანადო დამუშავება, მათ შორის თხილის გარჩევის, გაშრობისა და შენახვის საუკეთესო პრაქტიკა;

– თხილის უვნებლად და ეფექტურად შენახვის სწორი პრაქტიკა;

– ფერმერულ დონეზე აფლატოქსინის შემთხვევების პრევენცია მოსავლის აღების დროს და აღების შემდეგ განხორციელებული ოპერაციებისას.

საგანმანათლებო სესიებს, რომლებსაც საქართველოს თხილის სექტორის 100 წარმომადგენელი დაესწრო, უძღვებოდა FAO-ს საერთაშორისო ექსპერტი, მატეო ჯიაკონე. ტრენინგის მონაწილეებს, უახლოეს მომავალში მონაწილეებს კვლავ მიეცემათ შესაძლებლობა დაესწრონ ქართული აგრიჯორჯიას მიერ ორგანიზებულ კიდევ ერთ საგანმანათლებლო ღონისძიებას, FAO-სთან პარტნიორობის ფარგლებში, ევროკავშირისა და შვედეთის მიერ დაფინანსებული ENPARD IV პროგრამის ფარგლებში. თხილის შემგროვებლებისთვის, გადამამუშავებლებისა და ექსპორტიორებისთვის შექმნილი ტრენინგი ფოკუსირებული იქნება თხილის უვნებლობისა და აფლატოქსინის პრევენციის გაუმჯობესებაზე.

„თხილის წარმოებაში სურსათის უვნებლობის სტანდარტების გაუმჯობესება იწვევს საქართველოს თხილის სექტორის კონკურენტუნარიანობის ზრდას როგორც საქართველოში, ასევე საერთაშორისო ბაზრებზე, განსაკუთრებით ევროკავშირში. აგრიჯორჯიასთან ერთად, ENPARD IV პროგრამის ფარგლებში და ევროკავშირის და შვედეთის დახმარებით, FAO მოიცავს თხილის წარმოებაში სურსათის უვნებლობის რამდენიმე ძირითად ასპექტს – ბაღის მართვიდან მოსავლის აღებასა და შენახვის პრაქტიკამდე. ტრენინგის სერიების დროს მიღებული უნარებისა და ცოდნის გამოყენება უდავოდ აამაღლებს წარმოებული თხილის ხარისხს, რაც გამოიწვევს კონკურენტუნარიანობის და ეკონომიკური სარგებლის ზრდას საქართველოსთვის“, ამბობს FAO-ს პროგრამის მენეჯერი გუიდო აგოსტინუჩი.

„ევროკავშირი მოხარულია, რომ FAO და საქართველოს თხილის ღირებულებათა ჯაჭვის წარმომადგენლები თხილის კონვენციური წარმოების კონკრეტულ, მდგრად ალტერნატივებს აყალიბებენ. აღნიშნული პრაქტიკები მიზნად ისახავს სწორი ოპერაციების პოპულარიზაციას მომხმარებლისთვის უვნებელი პროდუქტის მიწოდების უზრუნველსაყოფად. ეს სტრატეგიული მიდგომა ასევე აუცილებელია ქართული თხილის კონკურენტუნარიანობის გაუმჯობესებისთვის ევროკავშირისა და სხვა საერთაშორისო ბაზრებზე. საგანმანათლებლო სერიები, რომლებსაც FAO აორგანიზებს ღირებულებათა ჯაჭვის წარმომადგენელ პარტნიორებთან ერთად, მყარ საფუძველს ქმნის ქართული თხილის ხარისხის გაუმჯობესებისთვის მდგრად საუკეთესო პრაქტიკებსა და საქართველოს სოფლის მეურნეობის მომავალში ინვესტირებით“, ამბობს ევროკავშირის დელეგაციის მდგრადი სურსათის სისტემების პროგრამის ოფიცერი დენის რეისი.

სურსათის უვნებლობის მოდულების გარდა, FAO და აგრიჯორჯია (ფერეროს თხილის კომპანია) 2025 წლის ივლისში სადემონსტრაციო დღის ორგანიზებას გეგმავენ. ღონისძიება, რომელიც განხორციელდება ევროკავშირის და შვედეთის ENPARD IV პროგრამის ფარგლებში, გააერთიანებს სასოფლო-სამეურნეო ტექნიკის იმპორტიორებს და ფერმერებს. სადემონსტრაციო დღის მიზანია ახალი კავშირების, ცოდნის გაცვლის და ფერმერების პროდუქტიულობის, ეფექტურობის, ინოვაციური გადაწყვეტილებების გამოყენებისა და სურსათის უვნებლობის სტანდარტების მიღების ხელშეწყობა.

ევროკავშირის შესახებ

30 წელზე მეტია ევროკავშირს საქართველოსთან მჭიდრო პარტნიორული ურთიერთობა აკავშირებს. ქვეყნის განვითარებას ევროკავშირი ცოდნისა და გამოცდილების გაზიარებით და ექსპერტული, ინოვაციებისა და ფინანსური მხარდაჭერის გზით ახორციელებს. ევროკავშირსა და საქართველოს მოქალაქეებს შორის ურთიერთობა მშვიდობის, თავისუფლების, დემოკრატიის, ადამიანის უფლებებისა და ინკლუზიური ეკონომიკური ზრდის საერთო ღირებულებებს ეფუძნება. საქართველოში ევროკავშირის მხარდაჭერის შესახებ მეტი ინფორმაცია იხილეთ მითითებულ ბმულზე:
https://eu4georgia.eu/ka/evrokavshiri-sakartveloshi/

პროექტის შესახებ

ევროკავშირი, ENPARD პროგრამის ფარგლებში, მხარს უჭერს სოფლის მეურნეობასა და სოფლის განვითარებას საქართველოში. სოფლად ეკონომიკური შესაძლებლობების გაძლიერებისა და საქართველოში სიღარიბის შემცირების მიზნით ENPARD პროგრამა 2013 წლიდან ხორციელდება. პროგრამა, საწყის ეტაპზე, მხარს უჭერდა სოფლის მეურნეობის პოტენციალის განვითარებას ქვეყანაში. მომდევნო ეტაპზე, პროგრამა ასევე კონცენტრირდა სოფლად მცხოვრები მოსახლეობისთვის ეკონომიკური შესაძლებლობების გაჩენის ხელშეწყობაზე. 2021 წლიდან, პროგრამა ქვეყნის მხარდაჭერას სურსათის უვნებლობის გაუმჯობესების კუთხითაც ახორციელებს ევროკავშირისა და შვედეთის ფინანსური მხარდაჭერით, ENPARD IV-ის ფარგლებში, სურსათის უვნებლობის კომპონენტის მთავარ განმახორციელებელ ორგანიზაციებთან, FAO-სა და ჩეხეთის განვითარების სააგენტოსთან ერთად.

ინფორმციას სურსათის ეროვნული სააგენტო ავრცელებს.

პროგრამაში შესული ცვლილებით, 150,000 ლარიდან 250,000 ლარამდეა გაზრდილი მოსავლის ამღები სასოფლო-სამეურნეო ტექნიკის შეძენაზე სოფლის განვითარების სააგენტოს თანადაფინანსების ჯამური ოდენობა, – ინფორმაციას საქართველოს გარემოს დაცვისა და სოფლის მეურნეობის სამინისტრო ავრცელებს.

„სოფლის განვითარების სააგენტოს თანადაფინანსების მოცულობა ერთ ბენეფიციარზე, მოსავლის ასაღებად განკუთვნილი სასოფლო-სამეურნეო ტექნიკის შემთხვევაში შეადგენს ღირებულების არაუმეტეს 30%-ს, მაგრამ არაუმეტეს 250,000 ლარს, ხოლო ჩაის საკრეფი ხელის ტექნიკის შემთხვევაში − არაუმეტეს 50%-ს, მაგრამ არაუმეტეს 1000 ლარს.

პროგრამის დადგენილი პირობებით, შესასყიდი სასოფლო-სამეურნეო ტექნიკა უნდა იყოს ახალი (ექსპლუატაციაში არ მყოფი), წარმოებული უნდა იყოს შესყიდვამდე არაუმეტეს ორი კალენდარული წლით ადრე; ამავდროულად, ტექნიკაზე საგარანტიო პირობები უნდა ვრცელდებოდეს განაცხადის წარდგენიდან არანაკლებ 6 თვის განმავლობაში.

განაცხადების მიღება 15 ივლისს 12:00 საათზე დაიწყება. პროგრამის ბიუჯეტი 10 მილიონი ლარია.

პროგრამის შესახებ დეტალური ინფორმაცია შეგიძლიათ იხილოთ ბმულზე“, – აღნიშნულია გავრცელებულ ინფორმაციაში.

გარემოს დაცვისა და სოფლის მეურნეობის მინისტრი დავით სონღულაშვილი მსოფლიო ღვინის ინდუსტრიაში ცნობილი საკონსულტაციო კომპანიის Dragon Phoenix Wine Consulting წამყვან ღვინის მაგისტრებს ფოგი ვოლკერს (Fogyee Walker) და ედუარდ რაგს (Edward Ragg) შეხვდა, – ინფორმაციას გარემოს დაცვისა და სოფლის მეურნეობის სამინისტრო ავრცელებს.

„მადლობა მინდა გადაგიხადოთ, ჩინეთში ქართული ღვინის პოპულარიზაციაში შეტანილი წვლილისთვის. ჩვენთვის მნიშვნელოვანია, ჩინეთში ქართული ღვინის ცნობადობის ამაღლება. ვფიქრობ, კოორდინირებული თანამშრომლობით შევძლებთ სასურველი შედეგის მიღწევას“, – განაცხადა დავით სონღულაშვილმა.

„ღვინის მაგისტრის საქმიანობაში მნიშვნელოვანია ემოცია, გულიდან წამოსული სიტყვები. მოუთმენლად ველი ღვინის რეგიონში, კახეთში სტუმრობას, რაც დარწმუნებული ვარ, დამეხმარება ქართულ ღვინოზე გულწრფელ საუბარში“, – განაცხადა ფოგი ვოლკერმა.

აღსანიშნავია, რომ ღვინის მაგისტრები ჩინეთის ბაზრისთვის მუშაობენ და ბაზრის ექსპერტული ანალიზის მრავალწლიანი გამოცდილება გააჩნიათ.

გარემოს დაცვისა და სოფლის მეურნეობის სამინისტროში გამართულ შეხვედრას ღვინის ეროვნული სააგენტოს თავმჯდომარე ლევან მეხუზლა ესწრებოდა.

ჩინეთი ქართული ღვინის ერთ-ერთი გამოკვეთილი სტრატეგიული ბაზარია, სადაც ქართული ღვინის ცნობადობისა და ექსპორტის გაზრდის მიზნით, 2013 წლიდან აქტიურად მიმდინარეობს მარკეტინგული კამპანია. ჩინეთი მყარად დამკვიდრდა ქართული ღვინის ექსპორტიორი ქვეყნების ხუთეულში. მიმდინარე წლის იანვარ-მაისის მონაცემებით, საქართველოდან ჩინეთში ექსპორტირებულია 1.4 მლნ ლიტრი ქართული ღვინო, რაც 65%-ით აღემატება გასული წლის ანალოგიური პერიოდის მაჩვენებელს.

ამჟამად ჩინეთში 40-მდე ქართული ღვინის სახლი, მაღაზია და სალონი მოქმედებს, ხოლო ღვინის ექსპორტს 100-მდე ქართული ღვინის კომპანია ახორციელებს.

ღვინის ეროვნული სააგენტოს მხარდაჭერით, მიმდინარე წელს ქართული ღვინო ჩინეთის სახალხო რესპუბლიკაში წარმოდგენილი იყო გამოფენებზე: ,,Fine Wine Hotel Exhibition”, „The China Food & Drinks Fair“, ,,RAW Wine Shanghai” და „Interwine China 2025“.

გარემოს დაცვისა და სოფლის მეურნეობის მინისტრი დავით სონღულაშვილი ბრიტანელ ღვინის მაგისტრს, სარა ებოტს შეხვდა. მხარეებმა დიდი ბრიტანეთის ბაზარზე ქართული ღვინის ცნობადობისა და ექსპორტის ზრდის ხელშეწყობის საკითხებზე იმსჯელეს.

ხაზგასმით აღინიშნა, რომ დიდი ბრიტანეთის ბაზარზე ქართულ ღვინოს უნდა ჰქონდეს ძლიერი პოზიცია, როგორც ხარისხიან და ავთენტურ პროდუქტს.

„დიდი ბრიტანეთი ჩვენთვის სტრატეგიული ბაზარია, ამიტომ ვცდილობთ, ხელი შევუწყოთ ქართველ მეღვინეებს ბაზარზე წვდომის გაზრდაში. ჩვენი გრძელვადიანი მიზანია მაღალი ხარისხის, პრემიუმ კლასის ღვინის წარმოება და მისი დამკვიდრება საერთაშორისო ბაზრებზე. საქართველოს არ აქვს ბუნებრივი რესურსი, მასშტაბურად აწარმოოს დაბალი ფასის კატეგორიის ღვინო; სწორედ ამიტომ, აქცენტი ხარისხზეა“, – აღნიშნა დავით სონღულაშვილმა.

შეხვედრაზე განსაკუთრებული ყურადღება დაეთმო ქართველი მეღვინეების და ღვინის კომპანიების მიერ ბრიტანეთის ბაზარზე პოზიციონირების გაძლიერებასა და ექსპორტის მოცულობის ზრდას. სარა ებოტმა აღნიშნა, რომ 2024 წელი წარმატებული იყო ქართული ღვინისთვის ბრიტანულ ბაზარზე და წლის განმავლობაში დადებითი გამოხმაურება და გაყიდვების ზრდა დაფიქსირდა. მისი თქმით, 2025 წლისთვის ერთ-ერთი პრიორიტეტია ონლაინ მარკეტებში ქართული ღვინის კომპანიების ცნობადობის გაზრდა.

„ჩვენი მიმდინარე წლის მიზანია, ქართული ღვინის პოზიციონირება მოვახდინოთ ონლაინ გაყიდვების პლატფორმებზე, რომლებიც დიდ ბრიტანეთში განსაკუთრებით პოპულარულია. გასათვალისწინებელია, რომ ღვინის ხარისხი იწყება ვენახიდან, შესაბამისად, როდესაც ვსაუბრობთ ექსპორტის ზრდასა და პრემიუმ სეგმენტში დამკვიდრებაზე, აუცილებელია ყურადღება მივაქციოთ ვენახის მოვლასა და პირველადი ხარისხის უზრუნველყოფასაც“, – განაცხადა სარა ებოტმა.

დიდი ბრიტანეთი მსოფლიოს ერთ-ერთი უმსხვილესი იმპორტიორი და ღვინის მომხმარებელი ქვეყანაა, რომელიც 2014 წლიდან განიხილება როგორც ქართული ღვინის ერთ-ერთი სტრატეგიული საექსპორტო ბაზარი. ქართული ღვინის დიდი ბრიტანეთის ბაზარზე დამკვიდრების მიზნით, ღვინის ეროვნული სააგენტო სარა ებოტის კომპანიასთან „Swirl Wine Group LTD” 2015 წლიდან თანამშრომლობს. სააგენტოს და ქართული ღვინის მწარმოებლებს შორის თანმიმდევრული და მჭიდრო თანამშრომლობის შედეგად, 2024 წელს ექსპორტირებული იყო დაახლოებით 426 ათასი ლიტრი ღვინო, რაც წინა წლის მაჩვენებელს 72%-ით აღემატება.

2025 წელს, ღვინის ეროვნული სააგენტოს ფინანსური მხარდაჭერით, ქართულ ღვინოს დიდ ბრიტანეთში კვლავ „Swirl Wine Group” წარადგენს. მარკეტინგული კამპანიის ფარგლებში დაგეგმილია დეგუსტაცია-სემინარები ქვეყნის სხვადასხვა ქალაქში, ქართული ღვინის მონაწილეობა საერთაშორისო გამოფენებში, ასევე მიზნობრივი სარეკლამო და მედია აქტივობები, რაც დამატებით შეუწყობს ხელს ბრიტანულ ბაზარზე ქართული ღვინის პოპულარიზაციასა და გაყიდვების ზრდას.